موعد رومانسي

[b][justify]هلو حشاشة

فد يوم اتواعدت آني وصديقتي نروح موعد رومانسي واتقفنة نتلاكه يم ابو الفلافل وبوكتهة كعدت من الصبح ساعة بالعشرة بالليل وغسلت بالصابونة مال حصة وفرجت سنوني بالمكناسة ونظفت اذني بالعودة مال ماسحة وزينت لحيتي بمكينة قص الثيل ورحت للمزبلة اللي بالشارع الورانة واخذت منهة قميص مشكك وبنطرون مزرف حتى البسهن بس القميص والبنطرون جانن وصخات فضطريت اغسلهن بالخيسة مال المجاري الطافحة كبال باب بيتنة وبوكتهة مشطت شعري وحطيتلة دهن مال حصة حتى يثبت بس جانت اكو شعراية مكنزعة ومكدرت اثبتهة بالدهن مال حصة فضطريت اثبتهة بالتفلة وحطيت على صدري ذيل ما جلب (عود هذا الرباط) ورشيت على نفسي مبيد مال حشرات صارلة سنتين اكسباير (عود هذا العطر) ، عالعموم طلعت من البيت وآني في قمة الكشخة والناس كلهة تباوع علية وسادة خشمهة (من الريحة الجايفة) وبوكتهة لمن جنت دا امشي اجة واحد علية من ورة وخمط فلوسي وانهزم وآني ركضت ورا و ورة ساعتين من الركض المستمر يلة كمشتة وكتلتة واخذت منه فلوسي ، و وراها لمن جنت دا امشي بالشارع طكت كبالي عبوة والناس كلهة تهازمت بس آني بقيت واكف وكلت خل اصور الأنفجار بالموبايل (خبل مو بيدي) بس بوكتهة لمن جنت دا اصور لكفوني الشرطة وعبالهم آني اللي زرعت العبوة ورادوا يكمشوني بس آني انهزمت وهمة ركضوا وراية و ورة خمس ساعات من الركض انداريت ولكيت الناس كلهة دتركض وراية بس آني ظليت اركض و ورة 9ساعات وصلت لنهاية الفرع ومشفت كبالي غير الأمريكان والمغاوير والحرس الوطني همة ودباباتهم وسياراتهم ورادوا يلزموني بس آني رحت ركض بالفرع مال حي العامل من يم مطعم الساعة و وصلت لطريق مسدود وانداريت ولكيت الشرطة والأمريكان والحرس الوطني والمغاوير والناس كلهة جايين علية ختى يلزموني بس آني طلعت من جيبي مشروب (ريد بل) وطبعا مثل ما تعرفون (ريد بل بيعطيك جوااااااااااااانييييييييييييح) فآني لمن شربتة رأسا طلعتلي جناحات وطرت بالهوة وخلصت منهم ، و وراها واخيرا وصلت لبو الفلافل بس فبل ما اوصل باوعت من بعيد ولكيت صديقتي واكف يمهة واحد من العمال اللي يشتغلون بالمحل مال فلافل وانطاها وردة