هلو حشاشة آني عمو بابا واليوم جاي احجيلكم قصة صارت فد يوم:
في سنة 4200 ميلادية / 100000هجرية اتأهل المنتخب العراقي لأول مرة للمباراة النهائية لكأس العالم وجان الفريق الثاني اللي اتأهل للمباراة النهائية هو أمريكا وبوكتهة آني رحت لجزر الواق واق حتى اشوف المباراة لأن المباراة صارت هناك بوحدة من الساحات اللي جانوا يربون بيهة حيوانات وبوكتهة جان الرئيس الأمريكي جورج بوش والرئيس العراقي نوري المالكي جايين للمباراة حتى يشوفوهة ، عالعموم بدت المباراة وجانوا جماعتنة ديلعبون زين و ورة عشر دقايق من بداية المباراة بالدقيقة 100 جماعتنة جابوا كول كوله اللاعب أحمد الجلبي من جوتة من نص الملعب وجتي الطوبة بالزاوية التسعين وأحنة العراقيين فرحنة كلش وكمنة نصيح: جيس جيس بوش هوة وزعاطيطة . بس ورة ربع ساعة بالدقيقة 1000 الأمريكان كولوا علينة والكول كوله كوفي عنان من ضربة حرة واحنة العراقيين ظلينة صافنبن ، وفوكاها ورة عشر دقايق بالدقيقة 100000 ردوا جابوا كول علينة والكول كولتة كوندليزا رايس بضربة ركنية وضربت الطوبة كلة براسهة وجتي كول والأمريكان ضحكوا علينة وكاموا يصيحون: جيس جيس نوري هوة وزعاطيطة . بس ورة دقيقتين بالدقيقة 500000 جماعتنة جابوا كول التعدل واحنة فرحنة ، و ورة ربع ساعة بالدقيقة 1000000 واحد من اللواعيب الأمريكان كسر واحد من اللواعيب العراقيين بمنطقة الجزاء والحكم جان قرارة ضربة جزاء للعراق والحكم مال اللعبة بوكتهة جان (هولاكو) وجماعتنة اختاروا اللاعب أياد علاوي حتى يضرب ضربة الجزاء ، ومثل ما تدرون هية من أسمهة *ضربة جزاء* يعني الفريق المحسوبة علية ضربة جزاء لازم ياخذ جزاء الغلطة اللي ارتكبهة ، فاللاعب أياد علاوي حط على نقطة الجزاء قنبلة بدل الطوبة ومحد انتبه علية ولمن صوفر الحكم ضربهة أياد علاوي بس الكولجي مال امريكا جان (رامسفيلد) وبوكتهة جان كلش خوش كولجي فلمن ضربهة أياد علاوي كدر يصدهة بس طكت علية وبوكتهة الجمهور كلة ضل صافن ميعرف كول لو لا وفوكاها جانت أخير دقيقة باللعبة بس لمن راح الدخان مال الأنفجار شفنة راس رامسفيلد فايت بالكول وفوكاها الحكم مال اللعبة جان اعمة وعبالة راس رامسفيلد هو الطوبة فحسبة كول النة واحنة فزنة بكأس العالم وكيفنة بس الأمريكان كالوا هاي أنتو فزتوا بالغش وبوكتهة انكلبت عركة والقوات الأمريكية كامت ترمي علينة والحرس الوطني والمغاوير والشرطة وجيش المهدي كاموا يرمون على الأمريكان والجمهور العراقي اتعارك ويا الجمهور الأمريكي وجورج بوش ونوري المالكي تلازموا من الروس واتعاركوا وكاموا واحد يكفش بشعر اللاخ بس بوكتهة نوري المالكي كتل جورج بوش لأن نوري المالكي جان اكرع ماكوا براسة شعر نياااااااااااااا ، بس بوكتهة الجزيرة انكلبت وغركت بالمي من هلكد ما تعاركنة وبوكتهة كلنة غركنة بس المهم انه احنة فزنة على امريكا بكأس العالم .
الإثنين 22 سبتمبر - 13:19:24
